冇諗過26歲就會有依個咁特別既經歷, 將成個心路歷程好詳細咁寫晒出黎.希望女仔都留意自己既身體, 唔好忽視經痛問題!
-
Q: 毛啦啦點發現自己有瘤?咩部位?
良性定惡性?
當時本身係做婦科抹片檢查,醫生隨口問我照唔照超聲波,結果一照就見到卵巢兩邊分別有一個5x5cm 同 2x2cm既瘤。當時未肯定係邊種瘤, 最後手術後驗組織先確認係良性既 子宮內膜異位 (俗稱朱古力瘤) 。
當時真係好shock, 完全冇諗過自己得26歲就生瘤, 之後先發現婦科病真係好common! 而且果時同男友一齊左兩個月都未夠, 拖左成個星期先敢同佢講..
-
Q: 咩原因引致朱古力瘤?以前有冇病徵?
月經期間, 經血 (子宮內膜組織) 倒流到盆腔內並著床於子宮腔以外既位置 (如輸卵管/卵巢/子宮頸 / 陰道), 即屬子宮內膜異位。
若內膜組織著床於卵巢,便會形成既充血囊腫,俗稱「朱古力瘤」,暫時成因都未明。
病徵主要係經痛,我諗好多女仔都有問題 所以完全冇留意~而且出黎做野後我有睇中藥調理, 已經完全冇經痛問題, 點知原來暗藏危機, 已經有個瘤係入面...
-
Q: 有咩治療方法?一定要做手術?
治療方法方面, 醫生同文獻建議5cm以上做手術切除, 而以下就可以考慮食藥.而我一邊個瘤就岩岩差唔多5cm, 之後我再諮詢另一個醫生, 再照超聲波, 個瘤係短短2星期又大左多0.5cm, 醫生都建議我做手術!
因為個瘤好似身體既計時炸彈咁隨時爆, 亦有人選擇生仔嗰時順便切埋, 但前提係要成功懷孕到至得, 如果個瘤壓住卵巢, 都有機會影響排卵同受孕。
所以綜合咁多因素, 果斷既獅子座直接book埋手術期, 同一個月進行手術!
Ali bb都係有同一種瘤, 成10cm先發現&切除!
-
Q:手術過程係點?
醫院|銅鑼灣既私家醫院
醫生|最初幫我檢查既婦產科醫生
手術|卵巢囊種切除術 (腹腔鏡)
時間| 約2-3小時 (0900 入院. 1500 入手術室. 1730 完成手術)
全身麻醉左之後, 醫生分別係我下腹左, 右 同肚臍開3個窿, 放腹腔鏡 (鏡頭) 同埋 手術工具去移除個瘤, 比起傳統開腹手術傷口細好多!
因為要係個咁細既窿拎番個5cm既瘤出黎, 所以要切到好細, 醫生手勢好好,將我個卵巢保留得好完整!
-
Q:手術之後痛唔痛?
完成手術, 過左麻醉姑娘就叫醒我。懷疑當時止痛落得唔夠, 所以我醒咗嗰一刻係痛到即刻喊咗, 嚇到姑娘即刻加返大個劑量, 之後就冇咁痛啦~
第一日要卧床行唔到路, 下面插尿袋 (竟然唔記得影), 手就吊鹽水同抗生素, 原來駁左尿喉係d尿會自然流出黎, 冇急尿既感覺, 新知識! 而當日男友請左假陪我入院, 等我做手術, 照顧我, 見證住腫到浮屍咁既我!
-
Q:手術之後幾耐出院?疤痕幾大?
手術當晚|卧床, 可以食番流質食物
第2日|正常餐, 夜晚拔尿喉 可以慢慢行
第3日|可以自由走動, 坐低要就住
第4日|出院!
第5-7日|中秋假, 家中休息
第8日|復工 (其實醫生開左2個月假紙)
肚臍個傷口最大, 但好處係有疤都唔覺. 做手術要打氣入肚 擴大空間, 所以勁脹! 左邊瘤大啲, 傷口都大少少, 但都唔過1cm. 不過位置都好低, 著低腰/bikini都睇唔到膠布邊. 9個月後既疤,
已經細到睇唔到~
-
Q: 保險賠唔賠得足? 自己補幾多?
手術總費用: 十幾萬 (<15)
80% | 公司員工份保險cover左8成, 我係有事先黎認真睇啲條款, 大家應該入職果時就做定功課!依份好在有得掛帳, 帶醫療卡入院,出院時唔洗比錢住, 醫院同保險公司計完數先出番封信叫我補番幾多錢~
20% | 而另外2成我自己本身份醫療保險出埋, 不過就預左要補番好多文件!有咩事真係要即刻同agent講, 佢會教你點做, 例如我第2次諮詢醫生就唔洗錢, 保險包埋!
十幾萬唔洗自己出真係好好彩, 唔係都唔知點算…
不過我正職唔係保險相關, 大家可以問番相熟既agent~
-
Q: 手術後既體會?
老土 但真係要珍惜身邊人
真係好興幸男友陪伴我經歷依段時期, 請假陪我做手術, 之後晚晚都有黎探我, 黑色暴雨全身濕晒都照黎😢
身體健康最重要!
婦科病真係好常見, 要例行做身體檢查唔好輕視!早發現就可以好似我咁, 做完手術又係一條好漢!希望借依個post可以提醒到大家, share比你在乎既人啦~
Comments